kersfeesvers
Vlam onder die water
25/12
sy onthou ‘n Asem oor haar wang
in die windstil namiddag
wanneer sy die Ritseling hoor
en voel hoe ‘n reuse Waterlelie
diep in haar rypsagte buik ontluik
verstaan sy geen tyding of taal
slegs dat ‘n Blom bestuif is
en sal dryf in ‘n verslete stal
dié nag skiet ‘n Saad uit haar hande
reg deur die heelal se helder spiraal
en êrens is ‘n kleurmal skare
al die engele en diere
oral saam in één verhaal
die moedermaagd se krip
is meteens slykloos spieëlblink
sodat sy kan drink kan drink
uit die Vlam onder die water
wat haar stil na binne wink
Uit: woud van nege en negentig vlerke, Tafelberg 2009.
Dankie vir hierdie lieflike vers, Carina. Jou nuwe digbundel was toevallig my vrou se kersgeskenk vanjaar en dié vers is juis een van haar gunstelinge in die bundel. (Ons het ongeveer ‘n jaar gelede self ouers geword.) Seënwense vir jou en jou gesin.