Johann Lodewyk Marais. Op Eugène N. Marais se spoor (1)

Jare gelede het ek een middag in my motor geklim om die eerste keer na die plekke te gaan kyk waar die digter, prosaïs, joernalis, regsgeleerde, amateurwetenskaplike, morfinis en kindervriend Eugène N. Marais in die Waterberg gebly het. Dié dag was Leon Rousseau se Die groot verlange: Die verhaal van Eugène N. Marais (1974) op die sitplek langs my, saam met twee of drie topografiese kaarte en ‘n aantekeningboek.

Oor sy Waterbergse ervarings het Marais baie geskryf en van dié boeke het hom beroemd gemaak. Die Waterberg met sy fauna, flora en mense het Marais besiel (vandaar waarskynlik sy boektitels Die siel van die mier en The soul of the ape) en hom heel aan die einde vergeefs laat hunker om soontoe terug te keer. Miskien daarom het die Waterberg my reeds as jong leser geboei en was dit die plek waar my reise op Marais se spore begin het.

Daardie middag in die Waterberg het ek ‘n bietjie koersloos na die Rietfontein van die gedig “Wanneer dit reёn op Rietfontein” tussen al die ander Rietfonteine op die kaart op my knie gesoek. Kort-kort het ek by die venster uitgeleun en by ‘n voetganger of fietsryer probeer hoor: “Waar is Rietfontein?”

Dié middag op die savanne het vir een van die unieke ervarings tydens my navoring oor Marais gesorg: Op ‘n werf buite Naboomspruit het ek hoopvol afgeklim en na die huis gestap waarheen ‘n jong man beduie het. “My ma het hom geken,” het hy tussen sy malende boelhonde agter my aan gesê. Op die agterstoep het ek die enigste persoon in al my navorsing oor Marais ontmoet wat hom nog uit die tyd van sy Waterbergse verblyf, 1907 tot 1916, self geken het. ‘n Ouerige mev. Van Heerden het vertel hoe sy meer as sestig jaar vantevore as dogtertjie op die Wonderdokter se skoot gesit en hoe hy met sy vinger liggies oor haar voorkop gevryf en haar “gemesmeraais” het.

Bookmark and Share

3 Kommentare op “Johann Lodewyk Marais. Op Eugène N. Marais se spoor (1)”

  1. Mooi! Ek het Rousseau se Die Groot Verlange so lank gelede gelees, ek kan glad nie onthou of hy kommentaar lewer oor hoe Robert Ardrey en kie oor Marais geskryf het en hom vir hulle doeleindes toegeeien het nie?

  2. Johann Lodewyk Marais :

    Desmond, jy opper ‘n belangrike saak: Die wyse waarop “Robert Ardrey en kie” Marais “vir hulle doeleindes toegeëien het”. Iets soortgelyk het egter ten opsigte van Etienne Leroux en kie gebeur.

  3. Dalene Mare :

    Baie mooi. Ek het Die groot verlange begin lees en het die Wonderwerker gaan kyk. Kan iemand asseblief vir my presies se waar is Rietfontein en of daar nog ‘n opstal op die plaas is en kan mense daar besoek afle.
    Baie dankie

    Dalene Mare