marcelle olivier. ghazal vir lente

ghazal vir lente

holi, delhi 2011

.

die weerklank van hitte is donker.

die volmaan bloei; die straat bly donker.

.

lente lê ‘n dagloop ver van noord.

van jou, ‘n jaarloop ver: suid is donker.

.

ek verbeel my jou vel ruik na amandels.

ek verbeel my ons praat. gode in die donker.

.

teorieë om eendersheid verskiet soos ink.

gousblomgeel buk die son voor donker.

.

onverlaat kwyn sewe stede weg: synloos, kru.

die poeier op jou tempelwang gis roosrooi-donker.

.

die weerkleur van seisoene klou.

hier slegs ewig reën, en droog, en donker.

 

 

© marcelle olivier. Mei 2011

Bookmark and Share

Comments are closed.