Zandra Bezuidenhout. Met leedwese

MET LEEDWESE

 

Ek het nie reg gemaak met jou nie Pa

wou nie dat jy by my in-kyk nie

het weggeskram van alle praat

en aan-raak met `n stywe rug vermy

die wig wat tussen ons sou  bly

tot met jou sterwe vroeg in Mei

toe jou gesig so naby was

wou ek verduidelik

in die halflig van `n dodekamer

dat ek bang was

dat jy my drif sou ken.

 

Ek het gesien hoe jy al-wetend kyk

jou oë tergerig as jy my toevallig teëkom

hoe ek in die gang jou blik ontduik

wanneer `n kêrel aanklop voor die dans

jy het geweet hoe ek al vroegaand liggies sweet

en dat die polsing van die trom en basviool

die glytoon van saksofoon

my oor die rand sou stoot

tot in die nag `n warm hand

die bandjies van my flambojante rok

laat glip oor die sonbruin skulp

van skouers en hals

tot alles kartelend oop was

hoe ek en hy uitasem

die ritme van die nag sou ry –

 

want jy was self `n sater van `n Pa

die tekens het jy immers

op jou vingerpunte saamgedra

voortaal en spel was vir jou mooi

ja jy het geweet

alles was uitgeknip om te verlei

ek het jou skrams gegroet

die geur van Worth-parfuum

het in die gang bly hang

toe jy so skuinskop

in die voordeur agterbly.

 

Ek het nie reg gemaak nie Pa

omdat jy naby was

en uit dieselfde seebamboes gesny.

 

 

© Zandra Bezuidenhout. Mei 2011

Bookmark and Share

2 Kommentare op “Zandra Bezuidenhout. Met leedwese”

  1. Zelda :

    Hartvol Zandra!

  2. Zandra Bezuidenhout :

    Dankie vir kommentaar op ‘n gedig wat lank gelede geplaas is, Zelda. Dis ‘n gedig oor ‘n situasie wat my na aan die hart lê, soos jy dit klaarblyklik aangevoel het.
    Zandra