Lewies Botha. Huisbesoek e.a. verse

Huisbesoek

 

Ek ontmoet ʼn Engelse Naudé;

ʼn loodgieter met ʼn Landrover en skipperke brak

en soos dit  maar is as die vrouens loop en die kinders

eenkant op swaaie swaai en die skipperke brak

onder jou voete kom lê

vlieë die oorskiet braai besoek

vet soos murg in die son skitter

aartappelslaai suurderig vergaan

ons herken dit in mekaar;

die versigtig vleis omdraai,

die innig streel oor seunskoppe,

die hoeveelste bier, die stilweg kak opvreet.

 

Hy was ʼn diensplig Luitenant, vertel hy;

LT NAUDE  in breë swart letters vasgestik

bo sy songebleikte browns se hempsak,

en op die lapelle; die pips soos voëlkak

blertse. Behalwe ballas bak moes hy elke goddelike dag

 (gereeld maar ontydig), so was die opdrag

ʼn herhalende ritueel uitvoer;

 

Wag voor die tuinhekkie

vir die gordyn om te roer;

soms sal die ou man loer

die voordeur swaar oopskuiwe

(winters sal droog en wit wees,

somers ook)

die tuinpaadjie,

ʼn lang sementgrys tapyt

langs

sal hy kom

en jou register bewerig teken;

Beyers Naudé.

 

 

Nadoodse ondersoek

 

My vriend, die man van Pole

ʼn patoloog met ʼn kennersoog

vir die fyner dinge van die dood

dans ʼn Salsa met sy Uruguayaanse uurglasvrou

en vertaal die blosende Spaans soos hy dans

ter wille van sy giggelende gaste.

(Jou kombers en my matras en daar lê die ding)

Naweke word wilde sampioene in die woude

versamel en waterverfskilder werke

van ou geboue van Gdansk geraam.

ʼn Aangename man, my bleek vriend van Pole,

hy berei ʼn ghoelasj van volstruis

en bedien ʼn goeie Kaapse wyn.

Ek nooi hom oor vir ʼn braai

en kyk hoe hy smul aan ʼn sny vleis,

gemoedelik met vroulief ʼn dansie draai.

Ek gaan skep asem buite, daarbinne

wink my Poolse vriend ,

weerkaats in die glasskuifdeur,

lag die maan gedreineer

deurskynend soos my lyf

wat ek sien lê; voor my vriend

gekruisig op koue staal.

 

 

Karnaval op Potchefstroom(1988)

 

Ons buffel vaar deur die strate

ons wieg op ʼn staaltrog water

die beskerming wat skrapnel

sal stuur, weg van ons knaters

rug teen rug staaldakke knik

R-viere soos kieries magasyne vol.

Die vyand loop met Checkers sakke

en stoot draadkarre tussen brand tyres

skooldogters laat los die springtoue,

tel hulle rokkies hoog op;

swart driehoekies,

vuisies in die lug.

 

Ons korrel skyfskiet teleskope

na gordyn skrewe waar BA meisies

in koshuiskamers verklee.

 

Ons braai by Potch dam

steaks uit die menasie gesteel

dis min dae ons voel fokkol.

 

Met die terugreis deur die township

foeter ons sommer so

oor iemand se groentetuin

en sleep ‘n wasgoedlyn

agter ons bruin optogvlot,

dis karnaval op Potchefstroom.

  

 

Die bure

 

Toe die nuwe bure langsaan intrek

braai die buurman elke aand,

dalk het hulle nie ʼn stoof

nie wonder ons.

In die oggende luier die Volkswagen

Golf lank terwyl die buurvrou roep

en wag. Sy bestuur, haar man sit

laag en die kleuter stil in sy stoel,

dalk word die man eerste afgelaai

wonder ons.

Saans hoor ons hulle rusie maak

dalk die spanning van die trek

die buurvrou se skreeustem

dwaal van kamer tot  kamer

tot dit stil word, dan wonder ek

of hulle ons ook soms hoor.

 

© Lewies Botha   Mei 2011

Bookmark and Share

Comments are closed.