Lize Viljoen. Byt vas, die somer kom weer

sonskyn na die reen

sonskyn na die reen

Hier in Suid Korea is alles skielik weer lowergroen en die lang winter nou net ‘n vae geheue.  Die gevoel bly my by dat oornag die bome se blare uitgekom het, in een sarsie, om skielik die grys toneel oor te neem met lowergroen grasie.

Die storms en bedreiginge van die afgelope maande kook ook minder oor in die mense se gemoedere.  Die kernstasie in Japan word slegs nou en dan genoem.  Noord Korea is weer stil, en in plaas van bomme stuur hulle internet boewe om in te breek by banke aanlyn.

Die hibernasie is vir eers verby, van vries in vrees teen die onvermydelike, en vries van koue~ so kom daar ook weer ‘n dag om iets by te dra op Versindaba. Alhoewel ek nie nou ‘n foto het van die groenigheid nie, sluit ek graag die volgende gedig in as plaasvervanger vir beeldmateriaal.

Lewendige Somer

Skakerings van groen is geil op die land,

hierdie reenseisoen stoom die heuwels

smiddae in die lae son wat kom staan

in die koelte van die middag.

Die meer is blou en die lug is blou,

die blare almal perfek gevorm, geen

gebrekkigheid kan gesien word nie,

selfs al was daar bestralings waarskuwings.

Ons beur weer op met nuwe moed, soos

die kwartaal tot ‘n einde loop en studente

weer kan bekostig om te glimlag

voor die finale eksamen wat nog kom.

Bookmark and Share

Comments are closed.