Zandra Bezuidenhout. Soenoffer van die suster

SOENOFFER VAN DIE SUSTER

 

Kort voor die sendingbondbasaar

kry `n offer in haar vingers vorm:

haar fudge kry ekstra botter

sy hou die blinkoog borrels dop

beheer die prut

toets in `n piering koue water

`n druppel soetigheid vir sagtebal

bepaal die regte konsistensie van die draad

begin dan driftig klop

haar houtlepel geoefen soos `n oor

wag op die hol geluid

en op die daad

keer sy die kooksel uit.

 

Intussen kry haar malvalekkers lyf

soos die pril begin van borsies

`n lem glip deur die pienk en wit

van romerige klapperys

dan `n skeutjie rooswater

en die klein ovaal van `n amandel

vir die binnebyt

van Turkse saligheid

wat dysag op die lippe poeier.

 

Dosies in kermisrokkies

word een vir een gevul:

handgemaakte offers

as troosgoed vir die gode

en vir `n suster aan haarself.

 

 

© Zandra Bezuidenhout. Junie 2011

Bookmark and Share

Comments are closed.