Carina Stander. Vier verse oor lugskoonmaakplante

LUGSKOONMAAKPLANTE

(Opdraggedigte vir skilder Salome Prinsloo se uitstalling, Sep 2011, Pretoria) 

 

lugplante

 

dag en nag skilder sy

die lugplante om iets goddeliks

– Asem wat asem skép –

vas te vang in kleur

 

sy sien die vlieënde motte

in ‘n maanorgidee, in ‘n lintroos

se oopkrul op ‘n stoep,

in die sleutelblom

se blare, wit gemarmerd

en sy kan iets vlietend verf

 

sy kan lug verewig

 

tot aan die vroegste snak

en die laaste sterf

 

 

orgideë

 

hier is baie orgideë –

‘n bontspul van dansende dogters

met sproetgesiggies en slangvelrokkies

 

hul draakbekkies

vreet die planeet

se giftige lug

 

 

spekboom

 

aan die jong spekboom se pers takke

blom die trosse

oitjiepienk

 

die boom vergrys en verkrom deur die jare

word lugtig

maar sonder die verstopte are!

 

 

baniaan

 

iewers in woud wat water spoeg

skud ‘n baniaanboom die vuilheid

uit sy ruie baard uit

 

© Carina Stander, 2011

Bookmark and Share

3 Kommentare op “Carina Stander. Vier verse oor lugskoonmaakplante”

  1. Johann Lodewyk Marais :

    Ek hou baie van jou plantgedigte, Carina.

  2. Johann Lodewyk, sien ek nou eers jou kommentaar van Okt hier raak. En aan die een wat “Duiwelsnuif” en “Eenhoring” en ‘n sin soos “die middelste had ‘n fyn blaarrank/ soos ‘n boerenooi se Sondagsrok” kon opdig: ‘n groot dankie!

  3. Johann Lodewyk Marais :

    Dankie vir die vriendelike woorde, Carina Stander!