Bernard Odendaal. Onthou se dinge. ‘n Liedsiklus

Onthou se dinge. ‘n Liedsiklus

 

•1.       eerste soen

 

daardie somer die dink

nog hy’s ou stryk seisoen

toe’s hy aap uit die mou

en baljarend net -soen

                           -soen

                           -soen

– en oor jóú

 

al die oggend daarná

het kom staan op die stoep

het geflikflooi en -wink

en gehiertjy en -roep

                         -roep

                         -roep

– en oor jóú

 

daar was tuine vol voëls

wat hul toonlere kerf

‘n granaatbos se oes

was soos krismis geverf

                              -verf

                              -verf

– en oor jóú

 

die verkeer van die stad

het geséllig verkeer

die gebeure om my

het opwíndend gebeur

                            -beur

                            -beur

– en oor jóú

 

ek het dinge gesien

ag, presies soos nog nooit

hoe ‘n oumansgesig

tot ‘n lag-landskap plooi

                               plooi

                               plooi

– en oor jóú

 

toe die son daardie aand

soos ‘n snoekerbal sink

het ‘n boerpot geluk

aan die hemel geblink

                          -blink

                          -blink

– en oor jóú

 

 

•2.       Aangetas

Die bolrond- en konkawe dinge

sou voortaan baie voel na jou

en melk en balsems, bome, hobo’s

het iets geadem, mmm, van jou

 

Formasies trekvoëls, fjords in woude

die vertes had iets weg van jou

en vase afgeslank soos dye

het sommer veel begryp van jou

 

Fasettigheid van woordjuwele

het ek hier in my kies voel speel

geslepe vir die lieflikhede

maar jou versprekend in geheel

 

 

•3.       Borrel

 

Jy sou nog soggens gou my dasknoop skik

en ruik na brooddeeg en laventelseep;

en deur die nuusleesman se grou relaas

het vetkrytgeel van kinderlag gestreep.

 

Gekom in my kantoor, kon ek jul sien:

die borrelsnoer gesels op pad na skool.

So halfpad deur my stapel pos

het ek onthou jy voer die tuin se voëls.

 

In ‘n vergadering verstrooi om elf

was soms jou liggaam op my sakelys.

Dan, eenuur, fletter duiwe oor die plein

soos ek my haas vir ete by die huis.

 

Die middag het ek klokslag aangepak,

met tikmasjien gekoers oor wit papier,

probeer om nie te bel of wonder nie

en tog die tyd voel voete sleep na vier,

 

want aanstons sou daar aanbreek: aardryk ons:

ons ligkorf in die ruim: ons soetverblyf:

ons minnegons van eet, van lag, omhels –

 

tot elkeen in sy slaapbel weg sou dryf.

 

 

•4.       hospitaalkamer

 

‘n kamerjas se vel-en-been oor hangerdraad

asof van vlees en bloed verlaat

     koud gelaat

 

‘n binne-aarse-drupsak half-leeg aan sy haak

wat in die afgemete taak

sy piep moes staak

 

‘n ruiker blomme in ‘n vaas wat nog vertoef

wat kleur-en-geur vir die beproef

maar onbehoef

 

‘n bed weer kraakskoon oorgetrek, aldus praktyk

‘n lewe se ongelyk

    uitgestryk

 

•5.       Uit die bloute

 

Vanoggend is ek uit die bloute

deur die draadloos met ‘n melodie

tot ou herinneringe weer verras.

 

Vereers onthou ek net jou hande

wat soos dinkswaels swiep deur jou gesels,

en hoe die somer in jou oë was;

 

en toe jou bene, bruin van tennis;

plekke aan jou appelgladde lyf;

konkawe woorde wat jou halslyn pas.

 

Onthou was skielik met verlang oorhoops

en ek moes buite my gemoed gaan lug,

maar dáár het blomme en die tuin vol voëls

die ganse dag met kleur en geur vergif.

Wat weet ‘n son, ‘n lied, ‘n vink of roos

van lieflikheid se skaduwee – gemis!

 

Vanmiddag was jy net abstraksie,

greinpatrone in ‘n fotoboek,

al het ek jou ook hóé probeer verbeel.

 

Die blaaie van ou versebundels,

flessies ou parfuum het ek beproef

en toentertyd se plate weer gespeel.

 

Maar niks wou jou vir my herskep nie:

alle poësie en melodie

was net maar skoonheid op verniet verspeel.

 

Verlang was skielik met vergeet oorhoops

en ek moes buite my gemoed gaan lug,

maar dáár het blomme en die tuin vol voëls

die ganse dag met kleur en geur vergif.

Wat weet ‘n son, ‘n lied, ‘n vink of roos

van lieflikheid wat brandend word – tot níks?

Bookmark and Share

Comments are closed.