Joan Hambidge. Meditasie, Vermindering

Meditasie, Vermindering

 

Dag ek het my lankal teen júlle, nie jou verweer,

my geliefdes wat my laat hang aan die bitterbessiebos.

Elk had ‘n penchant om my ruimskoots te verneder:

deur stilte, nie-reaksie, uitpraat en ja, om-my-te-los.

Wat vir ‘n ding is “vernedering” of “vermindering”?

Oor te gee aan die mag van haar, dus te kapituleer:

‘n afsêbrief onder ‘n ruitveër wat later reëntrane wegvee,

‘n terugkeer na dubbelspel om uit te pluis en te pleit

vir nog ‘n probeerslag, hoop dit was alles net wolhaar?

‘n Kartonboks vol geskenke gelaat voor my oggenddeur.

Die honger na liefde, hartstog het ek genadiglik verloor.

Dalk het dit alles, finaal en onomstootlik begin gebeur

toe ek moes getuig voor ‘n swart bandopnemer

-in camera – die liefde in “slow motion” vertaal:

nou’s ek “off camera”, buite die rol wat ek vir lank vertolk,

en dink na oor verweer, verneder, verminder én beweer.

Verloor en vertaal, alles ter wille van die troebel spel?

 

 

© Joan Hambidge. 2012

Bookmark and Share

Comments are closed.