Johann Lodewyk Marais. Twee dolfyngedigte

BOTTELNEUSDOLFYN

Tursiops truncatus

 

Uit die nousluitende seën

val vlieënde visse, krappe

en ‘n verdwaalde snawelvis

terug in die wye oseaan.

 

O, laat ook die dolfyne vry

uit dié nousluitende seën,

laat die skool gelate wegswem

in hulle magiese koevert.

 

Weggeraap uit hulle voortgang

en nou wagtend op die einde,

kop onder die water, snakkend.

sal hul in verdwasing vergaan.

 

 

KENNETH S. NORRIS

Dolphin days:

The life and times of the spinner dolphin

 

Ek laat die blaaie van sy boek

vinnig deur my vingers fladder

en meteens, stroboskopies, spring

‘n dolfyn uit die bloutes op.

 

Nat en glansend draai hy sy kop

en liggaam soos ‘n tolskaatser:

‘n flikkerende warreling

van stertpunte, vinne, blaaie.

 

Dan keer die dolfyn blitsig terug

na die verbeelde waterlyn

en in die man se beskrywing

sien ek ‘n skaduwee verdwyn.

 

 

© Johann Lodewyk Marais, 2012

Bookmark and Share

2 Kommentare op “Johann Lodewyk Marais. Twee dolfyngedigte”

  1. Johann de Lange :

    Uitstekende verse, Johann!

  2. Everline van Dyk :

    Ek hou van die gedigte, maar mis in albei die sagter vloei van dolfynswem, woorde wat golwend sing.