Joan Hambidge. By ‘n foto van my Ouma

By ‘n foto van my Ouma

Vir Libbet

 

Van my Ouma Hannah

in die Strand onthou ek veel:

haar reisplakboeke

met seereise,

selfs ‘n spyskaart

op duur papier

en vele foto’s van eksotiese bestemmings.

Die agterplaas wat uitkyk

op ‘n groen muur

kom nou terug na my.

‘n Oranjering en halssnoer

met skerp stekels

gekoop in die vreemde

sal ek nooit vergeet.

My pa, die appel van haar oog,

sou tot haar chagrin net dogters verwek.

My dowe Oupa Frank

skilder om ‘n verloopte lewe te besweer:

‘n donkiekarretjie kry sy rusplek

in my hart soos die gekraakte skulp

met die see wat bly dreun en dreun.

My trotse Ouma,

‘n chaperone vir haar suster

op ‘n vreemde bestemming

na ‘n mentor, dalk ook minnaar?

Die liefde tussen susters

word nooit genoegsaam uitgespel.

Digterlike susters soos Anne Sexton

en Sylvia Plath; susters in bloed,

in gelykenis én lewensloop:

jý die ewebeeld van ons Ouma,

‘n nooi Losper uit Bloublommetjieskloof,

waar háár ma meen Maggie

kan nie klavier speel nie,

haar portrette is aaklig en skeef,

en waarom kom sy tog nie tot trou?

Nooit kan ons herinneringe

of hierdie teer band met ‘n suster

verminder of vervreem nie. 

 

 

© Joan Hambidge, 2012

Bookmark and Share

Comments are closed.