Joan Hambidge. Ek skryf omdat ek moerig is

Ek skryf omdat ek moerig is

‘n aweregse ars poëtika

vir Antjie op 60.

 

‘n Vrouedigter bely

op ‘n keer dat woede

haar gedigte begelei.

‘n Ander een bly

in die verre vreemde

en perk verlange in.

‘n Ander is kinderloos

en ongedurig aan’t stry.

Een verdrink, so waar

die Here weet, digby

ónvergenoegd. ‘n Vuur

brand ‘n heilige met ‘n engel

deur haar lyf;

‘n ander draai taal

monsteragtig op syn kop.

Ylings, ylings gaan hul ons verby.

Niemand kan jou leer,

geen skryfskool óf handleiding,

van die spanninge onblusbaar,

wat die digkuns

woordeloos

laat ly.  

So hier

of ondermaans

hoor jy hul algar roep:

dit was, dit was ter wille

van die wrewel spel.  

 

© Joan Hambidge. 2012

Bookmark and Share

4 Kommentare op “Joan Hambidge. Ek skryf omdat ek moerig is”

  1. Jinne, dis mooi

  2. Marko van der Colff :

    As ‘ou’ gedugte vroue-liefhebber…
    Dankie Joan!
    Jy mag maar die spel speel…

  3. Ena Bester Posthumus :

    …omdat dit net so mooi is – dis hoekom! Dankie hiervoor.

  4. Buiteblaf Breytenbach :

    ‘n Goeie gedig, Joan. ‘n Nodige voorraad- en bestek- en voorsuster- en proviandopname ook. ‘n Lyn van vlamme waarsonder ons almal maar in die donker sou rondgetas het. Dankie.

    Breyten