Andries Bezuidenhout. Gesprek met Vilhelm Hammershøi by Ordrupgaard

 “Sonstrale”, 1900, 70 x 59 cm, olie op doek, deur Vilhelm Hammershøi (1864-1916).

 

 

Gesprek met Vilhelm Hammershøi by Ordrupgaard

 

Geagte Meneer Hammershøi, verskoon die aksent,
maar agter my tande sit die laaste lettergreep vreemd.
Die uitspraak, verneem ek, iewers tussen huil, hooi en heel –
vandag, vrees ek, die eerste eerder as die laaste twee.

Ter plaatse behoort formele aanspreekvorms
tot geskiedenisboeke of die sarkasmeregister,
maar is nogtans gepas waar ek vassteek
voor u skildery van vensters, deur, vloer, sonstrale
by Strandgade 30, Kopenhagen, in die jaar 1900.

Die son van agter in die saal waar dit nou hang
en sukkel ek om stip te kyk.
Tuis, in Suid-Afrika, val die son ook dubbelsinnig –
dalk meer bars as bleek
en word die blik ook beduiwel deur skaduwee en lig.

Sou ek dit kon skilder – oppervlakte met sonnestraal
deur die ruite van die Ou Sinagoge,
deur diefweringroosters in Muckleneuk,
of deur die tralies by Pretoria Sentraal?

 

Bookmark and Share

3 Kommentare op “Andries Bezuidenhout. Gesprek met Vilhelm Hammershøi by Ordrupgaard”

  1. Tessa Louw :

    Uitstekende beeldgedig en waardige wenner. Hartlik geluk Andries!

  2. Estelle Bester :

    Baie geluk Andries! Jy het verdien om te wen – my beskeie deel … ek bedoel mening.

  3. engemi ferreira :

    JISLAAIK, JA. Ek kan verstaan waarom jy gewen het Andries. Veels geluk. Jy praat nie alleen met die skilder nie, ook nie omdat jy dit het oor die skildery nie. Maar veral omdat jy praat met my – en so met elkeen wat lees, glo ek