Joan Hambidge. Gérard Depardieu

Gérard Depardieu 

 

Gérard Xavier Marcel,

heet Petarou as kind,

verlaat skool op vyftien,

beur na buite,

hitsige humeur,

nabootser, liegbek,

opskepper, danser,

veral akteur.

Wat lê agter die man

met die ystermasker?

Is hy dalk Cyrano de Bergerac

of Obelix? Of ‘n Gedoemde Jean

de Florette? Marguerite Duras

meen ‘n beeldskone wegholtrok van ‘n man.

 

Bekroond en bemind

met  Chevalier du Légion d’Honneur

en ‘n sintuig vir die regte oomblik,

daardie ding genaamd “tydsberekening”,

om dialoog te improviseer

of klavier te speel

voor die kameras

– Stanislawski sou sê:

“un coup de chapeau!” –

en sy eksvrou meen hy is ‘n digter.

 

Triomfantelike, uitspattige Gérard Depardieu

se lewe is ‘n swak geredigeerde film

van ‘n melodramatiese teks:

word elke jaar groter

as lewensgroot met die daalders

en die drienks.

Dronkbestuur, egskeidings,

die openbare verloëning van sy seun,

‘n junkie en prostituut

sterf op die koop toe ontydig.

Nou wag ons vir die slot

van hierdie B-film:

gedupe en geduplo.

 

 

© Joan Hambidge, 2013

 

Bookmark and Share

Comments are closed.