Melanie Grobler. Die Verleidster

Francisco Goya, Leocadia (or The Seductress).  
145.7cm x 129.4cm. Museo del Prado, Madrid

 

Die Verleidster

 

Ander mense slaap onder dakke, in hul kleurlose

en deursigtige drome verskiet die heelal

 

Goya se huis staan teen die randjies. in die laat lig word rooi

vervang met die asem van indigo of ’n skrale skok van geel

in die na-nag staan die huis swart geëts in die kom van slaaploosheid

 

tussen uile en sy listige kwaste betrap hy haar

en streel sy motvlerk oë oor haar, die sagte vel

’n afgedopte soete pruim, roes en die reuk van haar oksels

 

Goya se huis kreun, soos ’n donker bul daag sy hom uit

soos ’n doodsengel in swart leun sy teen die balustrade

kyk hoe trap die skewe voetjie in die brose stof

 

buite waai ’n ysige wind. Goya met sy swart jas

Leocadia met haar lang swart hare

hoeveel nagte sal sy nog in die arms van vreemde mans deurbring?

 

Ander mense slaap onder dakke, in hul kleurlose

en deursigtige drome verskiet die heelal.

 

 

Bookmark and Share

Comments are closed.