De Waal Venter. Die werklikheid verstel

 

Foto deur die outeur

 

Die werklikheid verstel

 

Hy luister

na die subtiele geluide

van iemand wat rondbeweeg

in die huis.

Hy is op die nag se bodem

en staar boontoe,

maar daar is nie die minste

flikkering van lig nie.

 

Hy vroetel sy gedagtes nader

en probeer dit aantrek,

maar sy hand kan nie die mousopening kry nie.

 

Iemand beweeg rond

in die huis.

Nou kan hy ‘n vlek

donker lig sien,

hoog bokant hom.

 

Daar is ‘n gedempte geluid,

‘n hand het iets beweeg.

 

Doodse stilte stap nader,

kom tot rus met ‘n bemoeisieke houding,

laat net die amper onhoorbare gesug

toe van ‘n baie ver vragmotor.

 

Iets het verander in die huis,

dit is nie soos dit vantevore was nie,

môre sal hy ‘n nuwe lewe begin.

 

 

Bookmark and Share

Comments are closed.