Breyten Breytenbach. die self is ‘n solder

Foto: Annebelle Schreuders.

 

die self is ‘n solder

 

die self is ‘n solder

jy klim soontoe op

met ‘n trap waarvan die sporte

lankal weggevrot het

 

om jou te verloor

in die geur van kwepers

elk afsonderlik toegenuus

in koerantpapier se verslane berigte

 

in repe stoffige sonlig

wat skuins val

oor die af-oor hobbelperd

en bokse vol briewe

 

en koperspaan dekorasies

waarvan alle betekenis verloor is

want jy was nooit

in die regte oorlog nie

 

uit die kis wat ruik na kanfer

haal jy die motgevrete bruidsrok

en trek dit aan

om ruggelings te gaan lê

 

in die solder van die self

se onderduiking 

sedert besetters die land

afgebrand het

 

tot herfs

en te luister

hoe dakvoeë kraak

onder sterre se gewig

 

(c) Breyten Breytenbach - 2013

 

Bookmark and Share

5 Kommentare op “Breyten Breytenbach. die self is ‘n solder”

  1. Anne-Ghrett Erasmus :

    Dankie vir nóg ‘n woordkardoes.

  2. Francis :

    Dit is ‘n hartverskeurende mooi gedig. Dankie Breyten.

  3. Evette :

    So ‘n heerlike laag op laag gedig waar beelde binne die oogwenk van 3 woorde rigting verander, omtower tot ‘n ander beeld, soos newel.
    Diep dankie!!

  4. Louis Jansen van Vuuren :

    aangrypend – beeldskoon – dankie.

  5. Marel Grobler :

    Bloot op ‘n eerste vlak van interpretasie is die beelde so helder dat ek die herfsson kan ruik. Die gedig raak mens diep, baie dankie!