Anné-Ghrett Erasmus. Klip en Klei

Klip en Klei

“… dat klippers ook ʼn eie soort lewe het.”

Martin Versfeld

 

kunswerke hang soos vrugte in ‘n boord

aan die bôrdienghuis se stokou mure:

 

evette weyers se kleipere met klipskrif

wuif soos koejawels aan die boom

 

angus taylor se bronskop balanseer

vol selfvertroue die magtige granietklip

perfek, ooreenstemmend, die vlekkelose

staalknope in die kop –

klip op kop

die eie-ek te ont-ek

 

helder strale van

kinders van die sterre

gevang in willem boshoff se dwaalwoorde

in patrone van melkweë

met name wat verwar in die oor en oor en omskrywe,

nes guido gezelle se skryfertjie,

om en om en om

 

duskant, ‘n kliplitografie

in ‘n raam teen ‘n muur,

buite ruimte –

strijdom van der merwe spel

hemels op spoelklip

en bloukalk- driehoeke

 

robbeneiland in paul stopforth se truspieël

weerspieël die rots, die see,

die skadu’s en die toring

in die geheue van water

en van klip

toe madiba nog daar was

 

die eiland weerkaats in joshua miles se hange van tafelberg

in reduksiehoutblokdrukke,

lae ink, ruïnes hier en daar –

koedoesberge lê uitgestrek

waar nicolene swanepoel se basterbeeskoppe

en perde, vas in die geskiedenis,

in blou en wit raku wei

 

adriaan oosthuizen se helskloof uitgestrek,

greg kerr se arrogante punkkop

graskop

menskop,

wat verskiet soos ‘n pienk klippie

in die ruimte:

“daar lê vuur in opgesluit,

… wat van die gode kom.”

 

“Rots der eeue is die rots wat leef.’”

 

 

© Anné-Ghrett  Erasmus 2013

(n.a.v. ‘n uitstalling ter ere van Martin Versfeld )

 Foto bo deur Tessa Louw: Bronsbeeld (Angus Taylor). 
Bookmark and Share

Comments are closed.