Joan Hambidge. Katabasis

Katabasis

 

We live life forwards and think about it backwards.

Howard Nemerov

 

Dieper delwend die verlede in

lesend aan die vyfde edisie

van die Norton

ontdek

 

ek ‘n vers van Simon Armitage

oor hoe jy nooit ‘n gil

kan stilmaak nie.

 

Verder die hel in

speel skeeloog Sartre

harpisikord

en sing vals-vals

die hel-is-ander-mense;

 

met Dowe Peet

aan’t klippe kap

met ‘n armed vision

en wete van Satan-Helios;

 

nes Dirk-der-duisende

hoor daar is moer

in sy grootkoffieboek

se digterlike parade.

 

Is ek dan steeds Orpheus

soekend na Eurydice

of word dié proses

meer-en-meer

‘n anabasis?

 

What the hell!

Jeroen Bosch trip-

tiek ‘n laaste oordeel

met sy visies

van die helnaarmaals.

 

Op my ou ramkietjie

met net een snaar

speel ek immer op papier

só heuristies aanmekaar.

 

© Joan Hambidge/ 2013

Bookmark and Share

Comments are closed.