Zandra Bezuidenhout. Wasprogram

Wasprogram

 

Deur die klus van buk en hang

word balies op ʼn Maandag

van hul lot verlos.

 

Nougeset gelaai, gevoer,

was en spoel en wentel

die outomaat.

 

Ná die siklus pen ʼn vrou

haar stripverhale aan die draad.

Aanlyn word bra en broek en kous

 

lyfloos getuie van haar kruis.

Bo- en onderkleding vind hul weg

na suiwering in son en wind.

 

Sy wou nog sê hoe soggens

in die agtertuin dit taks gebeur dat voëls

hul fluite in haar mond kom lê.

 

© Zandra Bezuidenhout / 2013

Bookmark and Share

Comments are closed.