Joan Hambidge. Hotelkamer Istanbul

 

Hotelkamer Istanbul

 

Kyk mooi,

sou ek sê,

‘n foto maak ‘n punt

in die groter komposisie of studium,

aldus Roland Barthes in Camera lucida:

die reistas toegesluit met ‘n reisbiljet,

en effens meer na links ‘n wasgoedsak

langs ‘n geel hemp en swart een

oor die stoelleuning uitgehang

voor die televisie se dooie oog.

Fresko’s uit die Bizantynse tyd

op die tafel: helaas onbespiedbaar.

‘n Gapende leerhandsak

(moeg soos die afwesige fotograaf)

regoor die rugsak

rustend op die bed

langs ‘n bottel parfuum,

reukweerder, selfoon en laaier.

Maar dis die pen

nou opgetel

om iets neer te stip

van daardie helder kamer.

Die lig van die Chora-Kerk

van Konstantinopel

aan die insypel

inkyk, inspeel

en vredig oor alles gespoel:

inkblou soos ‘n getyelose see.

 

 

© Joan Hambidge / 2013

 

Bookmark and Share

2 Kommentare op “Joan Hambidge. Hotelkamer Istanbul”

  1. Heilna :

    ‘n Mooi interieur, ‘n vreedsame maar suggestiewe afwesigheid in terme van die aanwesighede. Vgl. ” Ou geboue” onder die titel “Drie gedigte” in Litera by http://literator.org.ac.za vir ‘n buiteblik.

  2. Joan Hambidge :

    In my Meditasies – dit verskyn in November – is daar drie verse vir jou, Heilna. Inderdaad ‘n buiteblik – met waardering.

    Oor Istanbul wat ek in September weer besoek!