Plekgedig 11: De Waal Venter . ‘n Man in Johannesburg

‘n Man in Johannesburg

 

Die seun het kunsklas bygewoon

by die Tegniese Kollege

in Eloffstraat

naby die stasie.

Hy het geworstel om die nat reuk

van klei

in ‘n gesig te omvorm;

die oë was onsiende,

hulle kon nie die datum

op die kalender lees nie: 1954.

 

Die jong man

het deur die mense

op die besige sypaadjie

van Eloffstraat gevleg;

middagete-tyd, netnou terug kantoor toe –

‘n grypdief pluk ‘n vrou se handsak

uit haar hande,

die jong man bestorm hom,

die grypdief ruk ‘n mes uit,

iemand stuit die jong man voor die bors:

“hy gaan jou doodsteek. Los hom!”

Die grypdief laat die handsak val

en hardloop weg;

die vrou huil dankbare trane,

voetgangers stroom by hulle verby,

die insident vergete;

Die Vaderland

van 2 Mei 1971 sal nie hieroor verslag doen nie.

 

Die man ry in Eloffstraat af,

hou versigtig

die onvoorspelbare versnellings

en rigtingveranderings dop

van taxi-bussies,

wat blakerend om mekaar maal.

 

Hy luister na sy GPS

wat hom sê wanneer om te draai

op pad

na Home Affairs.

Hy vee oor sy smartphone

om te kyk hoe laat dit is:

11:35 9 September 2013.

Sy passasiers gesels gedemp

in Setswana;

‘n familielid het hulle huis ingeneem,

hulle woon in ‘n mokoko in die agterplaas.

 

Smouse verkoop lemoene en sigarette

by hulle tydelike stalletjies

op die sypaadjies.

Almal drentel,

daar is geen haas nie.

 

Die stad is stadig

besig om nuwe klere aan te trek –

die skoene is leer, die jongste mode,

die broek nog steeds die ou een,

die hemp taamlik verbleik,

die pet windmakering skeef.

In ‘n sak is ‘n nuwe ID;

dit sê

die draer van hierdie dokument is Suid-Afrikaans.

 

 

 

Bookmark and Share

3 Kommentare op “Plekgedig 11: De Waal Venter . ‘n Man in Johannesburg”

  1. Louis du Plessis :

    De Waal ~ Dis regtig net iemand wat die strate jare lank geruik het wie se beelde van die Goudstad mekaar so treffend kan opvolg. Dis so helder, so tipies, so opreg.

  2. Rdl. Jakkie Naudé :

    DeWaal jy verbaas my
    met jou raak sê
    van ervarings van jou belewens
    vanaf toe tot nou.

  3. Dankie Louis. Jy stel dit baie goed: “die strate jare lank geruik”.

    Ja, Jakkie, ouens met die jare agter die blad, soos ek en jy, het nogal heelwat beleef!