Plekgedig 14: Nini Bennett. Desember 1938, Port Alfred

Desember 1938, Port Alfred

(Vir MC)

 

Stroombelyn kloof die oer-torpedo

deur die getye van die marienegeheue

skuil bedags in nokturniese grotte

jag vertikaal met sardoniese tande

en vliet vooruit met die stert se stuurstang:

Vlieg – ʼn prehistoriese rugvin

ʼn draak deur die wisselgang van die see

en verby seevaartfabels en watersproke

die mutasies van die Leviatan

vaar, ʼn vegter met ʼn harnas skilde

gelade om met klein kieue te oorleef

duskant vergete tektoniese storms

of sweef ragfyn deur die flegma van die water

vinstrale waaierend oopgekam in ʼn harp

 

die burleske vierbeen

het ʼn droë sin vir humor

onverdrote swem hy voort

want evolusie is vir die voëls

en ʼn teorie bly in die weegskaal

soos die ganse oseaan:

 

Die selakant swem

en ʼn fossiel word lewendig

transformeer deur miljoene jare

die argief van die toekoms binne

 

en gaan aan wal in Port Alfred.

 

 

Bookmark and Share

2 Kommentare op “Plekgedig 14: Nini Bennett. Desember 1938, Port Alfred”

  1. Mellet Moll :

    ‘n Lieflike, oorspronlike benadering tot die plekgedig wat die koteks (Port Alfred) onderbeklemtoon en tog die mees beduidende gebeurtenis in Port Alfred se geskiedenis aandui.

  2. Susan Smith :

    ‘n Welkome toevoegging tot die selakantgedigte van nou onlangs, Nini!