Plekgedig 18: Susan Smith. EsiKhaleni, Hole-in-the-wall

EsiKhaleni, Hole-in-the-wall

 

mooi sing Ntombi

in die dubbelvolmaanmaand

waar die seeman met die vinhande

die meisie tussen kleihuise

en oor prilgroen heuwels sien loop

 

Ntombi sing

waar die golfbreker boegvis ploegvis stamp

en stamp        tot die sandsteen maagdelik

breek            tot die skalie in gitblou skywe

uiteenkraak

 

Ntombi sing

waar die meisie tussen strandnguni’s

oor die sandsoom water toe hardloop

opkyk        die halfgod en sy stormvis

déúr die landmuur sien kom

 

sing Ntombi      sing uit die water

sing waar die wit hingste skuimbek

runnik        die hoewe oor klippe

dreun          die water deur die sagte landplooi

van die Mpakovallei

stroomroof        die aarde skreeu      die tata

sy klere skeur

 

Ntombokuqala sing

die seemense sing

die landmense ween

die plek donder

die plek klink

esiKhaleni      sê die plekmense

die plek van klank

 

Bookmark and Share

5 Kommentare op “Plekgedig 18: Susan Smith. EsiKhaleni, Hole-in-the-wall”

  1. Lara :

    Mooi gedig. Met hierdie gedigte oor plekke leer ek meer van ons land. Soveel vreugdes, soveel hartseer.

  2. Mellet Moll :

    Lieflike verwoording van die msitiek van ‘n Afrikavrou in ‘n vreemde ver plek. Een van my gunstelinge.

  3. Susan Smith :

    Baie dankie vir die vriendelike kommentaar, Mellet!

  4. Nini Bennett :

    Ek sal hierdie gedig se weerklank onthou.

  5. Susan Smith :

    Dankie Nini!