Plekgedig 23: René Bohnen. Nieu-Bethesda 2020

Nieu-Bethesda 2020

 

Radioaktiewe kraaie sit in klosse op Shell se torings,

hulle gekrys verdring deur bore se ratatat-tat, deur

vierhonderd tenkwaens wat druis op die dubbellaanpad.

ʼn Meermin se uitgestrekte handjies verweer

in die suurreën, haar bierbottel-oë bars

rapat; rapat breek die watertafel. Sien is glo –

protesplakkate tolbos soos tuimelende orakels

oor fracking in die Oos-Karoo.

 

Moederaarde hoes ondergrondse gas, sy het gif in haar are.

Veelvermoedend blêr dragtige ooie sonder ophou in die gras.

 

Die vorige armes is nog armer, die lug is maalglas

bokant Helen se vaal jaart met krippe en kamele.

Deur die krake in Koos Malgas se gemesselde uile

glip ʼn gladde tweekopakkedis. Sien is glo –

protesplakkate verbleik langs magnate se beloftes

oor fracking in die Oos-Karoo.

 

In die broeines hoog teen Kompasberg lê ʼn witkruisarend

haar eerste eier – dit is grof, dit gloei in die donker.

 

 

Bookmark and Share

15 Kommentare op “Plekgedig 23: René Bohnen. Nieu-Bethesda 2020”

  1. Annerie :

    ‘n Lieflike dorpie wat ek ken…mag dit nooit tot hiertoe kom nie. Goeie ‘waarskuwende’ of futuristiese vers. Laat mens nadink.

  2. Everline van Duk :

    Uitstekende vers. Pragtige woordspeling en beeldgebruik. “Fracking” skep ekstra dimensie. Maalglas, Malgas en die meermin, miss Helen. Lieflik.

  3. Charles Tait :

    Rillend. Baie geslaagde visie van ‘n toekoms uitbeheer.

    Het dit baie geniet.

  4. helize van vuuren :

    Vertaal dit/laat dit asb dadelik vertaal in zoeloe xhosa en engels…dit mag dalk soos
    ferrus se baartman-gedig d parlementsitters tot ander insigte bring…

  5. Carina Stander :

    Wat ‘n skokmooi gedig!Geluk,Rene.

  6. René Bohnen :

    Baie dankie, Carina!

  7. Susan Smith :

    Uitstekende gedig, Rene! Skokkend, apokalipties, beeldend. Baie geluk!

  8. Uysie Alberts :

    Die hele atmosfeer van Nieu-Bethesda puik vasgevat; maar met die onheilspellende moontlike uitwerking van die beoogde ‘fracking’. Dis ‘n besonderse plek en ‘n uitstekende beeldryke gedig. Dit gaan mens nog lank laat dink!

  9. René Bohnen :

    Ek waardeer regtig hierdie kommentare, baie dankie!

  10. Lettie Murray :

    René – jy maak die hele prentjie mooi oop, vir ons wie nog nie daar was nie – en bied jy jou vers so interessant, en kragtig bewoord! Groete

  11. René Bohnen :

    Baie dankie, Lettie Murray – ek hoop jy kan die dorpie binnekort besoek!

  12. René Bohnen :

    Dankie, Susan! Geluk ook met jou pragtige vers – ek het die liriese kwaliteit daarvan besonder geniet.

  13. René Bohnen :

    Baie dankie, Uysie, mag hulle wat die mag het ook hieroor nadink!

  14. HOOR HOOR! Baie bly jy het prys gewen. Die is ‘n besonderse gedig!

  15. René Bohnen :

    Baie dankie, Charles!