Plekgedig 30: Joan Hambidge. Standerton

Standerton

 

Standplaas van A.H. Stander 

– “Grootverlangen” –

gee die dorp sy naam.

 

ʼn Mikrokosmos van ʼn land;

hier is Jan Smuts ontsetel;

ʼn skoolleuse: ‘Sapientia Vincit’.

 

In die Sakhile townships

heers opstand en teëpraat;

ʼn Boereoorlog-monument

 

geplunder deur insurgente

en klokslag élke sewejaar

oorstroom die walle van die Vaal.

 

Ál die stryd ten spyt,

is daar geen plek

op aarde

 

waar stilte só

kan wegspoel in stil-wees,

geen dorp

 

waar die son in die Hoë-

veld so láág

kan sak.

 

Dorp van ooglopende konflik:

anderkant jou grense

onthou ek opgaarwaters,

 

kleurvolle kosmos versny

met die geel van koring amper

nes in ʼn Van Gogh-skildery.

 

Bookmark and Share

Comments are closed.