Plekgedig 52: Marie Bredenkamp. Calvinia

Calvinia

 

moenie vrae vra

of eens bespiegel

hóé ver terug kán ‘n kind onthou:

 

want oogpisters in die geut

neffens die koestering

van ‘n oop werf se wildevy

nestel nóg

(warm soos moederliefde)

as ek laatmiddag

verby die boekehuis ry

en pennielegging om die kerk

en tiekie-aande

flits in foto’s onbeperk verby

 

daar is name wat my vasmaak

in bloed en wéét

klipwerf en kotjieskolk

slingerfontein en matjiesvlei

die bloukopkoggelmander

wat my dophou

priem-dreigend van die platterkrans

van anderkant die drif

waar ek voëls moet verskrik

onder die soetpruimboom

se doekkombers

 

keelseer op die puts

en die sagte troos

van skuinskoek en gedrukte vy

die reuk van dassiepis

legendes oor oupa klaas honderd

en groot toren se louws

 

calvinia

is die hantam

met die ruimer vlaktes

die geiler somers

die yler winters

en lentes

wat angste uit jou hart  kom ruk

en ‘n herfsgety

wat jou tong laat woorde maak

 

jy klim steiltes teen rebunie

en hoor hoe ma nog sê

met die vloed

het die sakrivier

soos mofskaap oor die land gekom

 

kambro en botterblom

kaktus en turksvy

die growwe grein

van wingerdblaar

as jy korrel-korrel

steel van die prieel

 

met ál die geure

van melkkos en kaneel

in my geheue vasgemaak

bly dit die plek

van lewensdrif en aardse rou

 

daar het ek léér sien én hoor

leer bid

soos lammervanger en dassie

soos rodin se denker

op leiklip rondgesit

 

die wydsheid van my wêreld

het ‘n horison sonder soom

dáár het vers en poësie

soos die ewigheid

binne my kom woon

 

 

 

Bookmark and Share

17 Kommentare op “Plekgedig 52: Marie Bredenkamp. Calvinia”

  1. Madeleine Spies Eilerd :

    Calvinia:’n Gedig so na my hart!

  2. Irene van Vuuren :

    Hier kan jy Calvinia sien, ruik, hoor, voel en proe. ‘n Baie suksesvolle pleknaamgedig!

  3. Calvinia Ongelooflike mooi beskrywende sielsgedig!

  4. Hannelie du Plessis :

    Dit is die soort vers (as ek dit so kan stel) wat ek van hou! Baie beskrywend. Kan myself op daardie plek plaas!

  5. Monica Muller :

    My kinderjare-herinneringe aan Calvinia speel deur hierdie vers opnuut voor my af. Briljant!

  6. Elize :

    Dis pragtige gedig vir die mooie Karoodorp. Dis waar mense nog plat op die aarde opgte mense is.Die gedig beskryf dit net so opreg. Dink nou sommer aan die Groot Posbus en die Hantamhuis. Dis ook een van die belangrikste sentrums van wolproduksie in Suid-Afrika. ‘N Bedrf waarby ek lank betrokke was as Redakteur. Meer oor die dorp: Daardie sinagoge met sy kenmerkende art-déco-boustyl verwys na die belangrike rol wat Joodse inwoners vroeër in die gebied gespeel het. Dit huisves nou die Calvinia-museum.

  7. Hierdie gedig praat met my deur ryk beelde en emosie..

  8. Adam :

    Ongelooflik hoe hierdie gedig jou laat voel asof jy self in Calvinia grootgeword het. Mens voel so eie met die gedig. Skitterend gedig!!

  9. Judith van Dyk :

    ‘n Lieflike ,beeldende en klankryke vers …met die lees (en herlees,omdat dit sulke pragtige herinneringe oproep)leef ‘n mens jou in elke faset van die lewe en lekkerkry as kind in.Pragtige vers met ‘n treffende slot!

  10. Dudley Cato :

    Pragtige beelde wat selfs geruik en geproe kan word!

  11. marieta :

    Calvina – nostalgies onthou ek weer vandag “my liewe lekker Hantamwyk”

  12. saline robberts :

    Marie….dit is skitterend geskryf…!!!

  13. Uysie Alberts :

    Uitstekend; die vers roep met klank en beeld ‘n skildery van Calvinia en sy streek met vele fasette op… en die heimwee na ‘n grootwordstreek.So mooi!

  14. marie bredenkamp :

    Baie dankie aan een en almal vir jul meelewende en positiewe kommentare op my gedig … dis vir my baie lekker om te dink julle kon saam met my die ruimtes van my kontrei ervaar. Baie dankie ook aan Versindaba vir die “boost of confidence”!! En natuurlik aan Cordis Trust wat hierdie geleentheid geskep het – hierdie dag het vandag ‘n eie lingua franca gespreek. Groete, M

  15. Ananda :

    Gedig het my meegevoer en ek het sommer weer klein gevoel.

  16. sakkie :

    Puik! Treffend! Dis waar ons groot geword het.

  17. marie bredenkamp :

    Baie dankie Sakkie: hoe nuuskierig word ‘n mens nou om almal algter die name te kon ‘sien’! Groete, M