Martjie Bosman. Woelige Woensdag

WOELIGE WOENSDAG

 

Wanneer water in die wasmasjien begin spoel

spring Kerneels vies oor die heining en bly stuurs

daar wag tot Maria die stofsuier wegpak.

Maar Klara kom aangedraf op Sam se groet,

skuur teen sy bene, skarrel op teen ’n stam

om mooi te kan sien hoe hy die beddings bewerk.

Onsigbare tuindiensmanne en masjiene brom

agter mure, pluk vullisblikke in opritte uit die gelid

waar hulle wag op die koms van die verwyderaars.

 

Onherkenbaar gehelmde fietsers flits verby

die stadige stappers met pette en tekkies;

swenk weg van moerige motoriste teen

die bulte gevang agter sementmengers

en lorries vol bakstene wat netnou

dwars in die pad gaan stop met hul vrag.

By die verkeersirkel en die robot wat rooi

bly flikker takseer ons mekaar; glip gou in

voor ’n stadige ou; verwissel vinnig van baan.

 

Dit woel op Woensdae, dit woel in die huise

en die woonbuurte; dit woel langs die strate;

dit grou in die grond, dit laat waai op die paaie;

dit werskaf onverdrote op morsige boupersele.

Julle, die wassers van wasgoed, die suiers van stof,

die grawers van slote, die pakkers van stene,

die waaiers van rooi vlae, die swaaiers van arms,

ek groet julle dankbaar, my vasberade stadsgenote.

 

 

© Martjie Bosman / 2014

 

Bookmark and Share

3 Kommentare op “Martjie Bosman. Woelige Woensdag”

  1. Maria Snyman :

    Baie mooi vir my Martjie, Woensdae (en dus ook die lewe) sal nooit weer dieselfde wees nie!

    Daar is iets pertinent pragmaties aan die “verhaal”. Ek identifiseer veral met daardie woelige rumoerige tuindienste (of huisskoonmaakdienste) wat deesdae soos sprinkane op ‘n plek toesak, buurt of kompleks. Ek verstom my aan hul spangees.

    Ek is mal oor die deel:

    “By die verkeersirkel en die robot wat rooi /
    bly flikker takseer ons mekaar; glip gou in /
    voor ’n stadige ou; verwissel vinnig van baan”. Ons moet maar ons kansies vat om voor te bly.

    “(…), pluk vullisblikke in opritte uit die gelid / waar hulle wag op die koms van die verwyderaars” is ook pragtig … iets diep dreun daarin, ek kry die “vullisblikke” skoon jammer!

  2. Rothea :

    Natuurlik is ek weer mal oor die verwysings na Kerneels en Klara. Dankie

  3. laura :

    Ek belewe weekliks soortgelyke dae – net op Donderdae in my buurt.