Alwyn Roux. stilte aan die ander kant van ruite

stilte aan die ander kant van ruite1

 

hy staar ʼn tydlank stip na die skerm

scroll na 2.4.1   dink die wysgeer het gelyk

die kunswerk onthul ʼn stryd

tussen wêreld en aarde

sit terug            lees die gedig (vir analise)

maak ʼn lys van woorde om te wys

hoe elk tot die een of ander hoort

 

is wêreld die onvoorstelbare geheel

waaraan ons onderworpe is

solank die paaie van lewe en dood

en seëning en vloek

ons in vervoering bring  

 

aarde dit waarin die oprys van alles

teruggeneem en beskut word

dit wat nie gedwing kan word nie

wat onvermoeid

en sonder inspanning is

 

luister hy met die geluid

van voëls hoe stilte aan die ander kant

van ruite klink

kyk hy weer na die skerm

en soek ʼn woord wat sonder aarde is

 

1 Met verwysing na Martin Heidegger se essay “The origin of the work of art” (2002:1-56).

 

© Alwyn Roux / 2014



Bookmark and Share

3 Kommentare op “Alwyn Roux. stilte aan die ander kant van ruite”

  1. Maria Snyman :

    “en soek ʼn woord wat sonder aarde is” – ‘n mooi reël, ‘n sweempie nostalgie, maar te tr.aag en aa-rds om werklik nostalgies te wees, die sagte (maar stemhebbende labio-velêre approksimant) w-klank wat wip sit ook ‘n tikkie aweregse humor in die humus-mundus polemos. Ek “dink die wysgeer het gelyk / die kunswerk onthul ʼn stryd”.

    Lekker skryf, Alwyn! Solank die “seëning en vloek” van die akademie “ons [nog] in vervoering [kan] bring” – is daar dalk hoop?

  2. Hilda Smits :

    “…soek ʼn woord wat sonder aarde is”. Pragtig.

  3. Andries Bezuidenhout :

    Ek hou ook baie hiervan. Digters by hulle vensters. Stilte anderkant ruite en ruimte.