Joan Hambidge. Vlugplan

Vlugplan

 

‘n Vliegtuig verdwyn

op dieselfde tyd

word berig hoé

‘n voortvlugtige

in ‘n badkamer

haar verweer

teen vier skote

 

geskiet deur ‘n toe

deur en ballistiese

eksperts presies bepaal

hoe vinnig en hoe ver

dit alles gebeur

het en wrakstukke

 

langs die kus opgemerk

van Maleisië na nêrens

om ‘n sinkende wrak

blou te verf in ‘n tyd

 

wat die private publiek

word die “violence within”

beskerm nie meer teen

die “violence without”

en Wallace Stevens

 

sou bepaald ook wonder

hoe maak ‘n mens sin

oorleef jy met oggendnuus

wat via internet en youtube

alles uitblaker oor ‘n vlugplan

 

met aankoms uitgestel

en bloedspatsels teen ‘n kamermuur

‘n paar wit plakkies

netjies langs ‘n bed geplaas

kort voor die moord

en jy hoop dat alles vinnig

 

oor was vir hulle in daardie vliegtuig

en vir haar op vlug met ‘n selfoon

 

en miskien het sy die kaptein

van die vlug gebel

 

toe sy roep om hulp

in haar sinkende skip

 

rooi geverf

op ‘n Valentynsdag

wat sy elke jaar

met ongestuurde blomme

sal vier saam met die kaptein

 

wat vermeendelik

homself wou uitwis

en ‘n versekeringsmaatskappy

wat eise uitbetaal

 

lank voor daar uitsluitsel

gevind is oor waarom

ons aan soveel blootgestel

word in hierdie troostelose

 

gedig sonder ‘n begin,

middel of einde

 

in opgehefde tyd.

 

 

© Joan Hambidge /2014

Bookmark and Share

5 Kommentare op “Joan Hambidge. Vlugplan”

  1. Joan Hambidge :

    http://joanhambidge.blogspot.com/
    Paul de Man, Rilke en Pieterse: oor die allegorie van lees

  2. Maria Snyman :

    Dankie vir die skakel, Joan – ek het die boek (op uitverkoping gekry), maar nog nie gelees nie – nou gaan dit uiteindelik lees. (Terloops, ek is mal oor jou portret op Woorde wat weeg).

  3. Joan Hambidge :

    http://joanhambidge.blogspot.com/
    Opperman, Jung en Kermode

  4. Evette Weyers :

    Baie aangrypende kruisbestuiwing en wisselwerking tussen twee taumatiese gebeure wat ons daaglik wil oplos deur die oë van die aanklaer. Wil oplos deur te sien wat werklik gebeur het. Die waarheid bring mos vryheid en vrede
    Baie dankie Joan

  5. Joan Hambidge :