Joan Hambidge. Tweetalige woordeboek

Tweetalige Woordeboek

 

Op ‘n Saterdagaand

lees ek oor die klaaglied

van Dawid oor Saul en Jónatan

in Die Tweede Boek van Samuel.

‘n Geskenk van my moeder,

‘n Bybel oorhandig op 11/9/68

met beste wense vir ‘n mooi toekoms.

My kinderhandskrif in blou balpunt

vertel van die gebed en smeking

opgeteken in Filippense 4:6.

Die wrede oorloë en die lot van Tamar

trope vir dié bloedskendige proses?

In die Tweetalige Woordeboek

van Bosman, Van der Merwe en Hiemstra,

in 1975 aangeskaf, soek ek vannag

na die regte woord vir demaskeer.

En nou? I.W. van der Merwe

is mos Boerneef, nes die digter hier

tweeledig en paradoksaal,

sowel afsydig as diep-gelowig,

vertroosting vind

in ‘n keertwending

van haar kenletter.

 

© Joan Hambidge /2014



Bookmark and Share

Comments are closed.