Joan Hambidge. Brooklyn-brug

Brooklyn-brug

 

Thy cables breathe the North Atlantic still.

Hart Crane

 

I too knitted the old knot of contrariety …

Walt Whitman

 

O Brooklyn-brug,

             veel besonge oorgang

van lewe na dood,

             jy staan opgeteken

in Walt Whitman

            en in Hart Crane.

Ook Jack Kerouac

            besing jou.

Maar dit

            is Majakofski

ver terug in 1925

            wat glo

jy sou selfs

            die Oordeelsdag

oorwin

             en oor die débris staan.

Hierna sal

             alles vervorm

en verwerk word

             met jou

as model.

             Daar was

so ‘n dag,

             genaamd 9/11,

toe jy weerstand bied,

            ook ‘n uitgang was.

Amateur-fotograwe

            kon

die vuur en rook en swael

            ópvang

vanaf jou onwrikbare posisie

             wyl

‘n boot geluidloos

             onder

deur jou vaar.

 

© Joan Hambidge / 2014



Bookmark and Share

2 Kommentare op “Joan Hambidge. Brooklyn-brug”

  1. Joan Hambidge :
  2. Joan Hambidge :

    ‘n Puik seleksie met nuwe verse van Douglas Reid Skinner. Hemels.

    http://joanhambidge.blogspot.com/