Jacobus van der Riet. Op die vooraand van Corpus Christi, 16 Junie 1990

Op die vooraand van Corpus Christi, 16 Junie 1990

Hector Pieterson word weer gedra deur die strate,
van lamppaal na lamppaal in die arms van Mbuyisa.

Hoor hoe roep die plakkate: Remember June 16.


Hector Pieterson lê kop agteroor, so swaar gewond,
sy oog gesluier, regterhand geknak oor sy maag

die bloed om sy mond gestol deur die foto.


Mbuyisa se mond is van inspanning oopgesper
en van afgryse; hy dra Hector op die hande,

dra hom ver, tot in derduisende harte.


Hector Pieterson is deur drie sarsies verf
gestensil teen ‘n muur, swart, groen en geel:

die skoolkind sterf in die arms van Mbuyisa.


Hector Pieterson word weer gedra deur die strate,
sy lyfie vir ewig in die arms van Mbuyisa Makhubu.



©
Jacobus van der Riet / 2014



Bookmark and Share

2 Kommentare op “Jacobus van der Riet. Op die vooraand van Corpus Christi, 16 Junie 1990”

  1. Dankie, Jacobus – baie bly oor hierdie gedig in Afrikaans. In Berlyn is daar n
    skool na Hector Pieterson vernoem.

  2. Carin Lawrie :

    Verrykende en ver-reikende gedig. Dankie daarvoor.