Lykdig 19: Heilna du Plooy. Buiteblad

Buiteblad

Vir Ted Hughes

 

Rooi in die middelstrook. ’n Digte band

papawers. Haar blomme. Haar kleur.

Haar oorwoekerende energie. Die mure,

die harte en blomme op meubels in háár rooi,

 

haar rokke, haar lippe, het jou wit versmoor.

Jy wou haar graag onthou in blou. Syig

die kleur van haar swangerskap. Blou

in die oog van die orkaan. Vir ’n oomblik

 

kon jy hoop sereniteit is moontlik.

Vroeg reeds het jy vermoed

dat die hare van vroue ’n vallende

hemel van marmer kan stuit.

 

Rooi blomme in ’n blou raam ingebed,

is wat die wanhoop aan liefde oor het.

 

Bookmark and Share

Comments are closed.