Lykdig 33: Louis Jansen van Vuuren. Maak dit ‘n dubbel

Maak dit ’n dubbel

vir Arthur Rimbaud en D J Opperman

 

in ‘n grot

se groot blou donkerte

vlam sy vuuros

soos die braambos

rokende dolos

wat flenter en val

vloeksteenwoord

met ’n toekoms

en ’n verlede

timor mortis conturbat me

 

sy seisoen van hel

wissel waswit blaaie

vleeskleur

spookbeeld

niks

in die begin was die Woord

lewendige Lazarusletters

wat opstaan en loop

timor mortis conturbat me

 

sy buffel

ken geen metafisika

jou illuminasies

word liefdesletsels

ons hou hande

by die pêrelpoorte

hy is dubbeld – jy is dwars – ek is

timor mortis conturbat me

 

as ons duldelose dae

soos droë rowe val

draai Tyd sy wysters

om en om en om

die klok slaan sy slag

kaarthuiskoning kantel

timor mortis morte pejor

 

 

julle vlieg vooruit

na ’n plek

van doodlêstiltes

sterre wit soos sout

Bokkie

   ek moet huis toe gaan

 

 

Bookmark and Share

Comments are closed.