gilbert gibson. ons het half in die middel

ons het half in die middel

 

ons het half in die middel van die vry-

staat met mindere demone gebly my hare in

hoofsaak altyd kort gesny die sandklipmure

was van meer wind as weer

gegroef die meeste dae was dit berchtesgaden partymaal

stalag luft. die pad dorp toe besaai met die geeste

van meerderwaardigheid, sodat dit vreemd was dat my pa my

nooit teen ‘n ander gewaarsku het nie, daardie

draers van rykdom sonder werk plesier sonder gewete

wetenskap sonder siel kennis sonder karakter politiek sonder beginsel

handel sonder moraliteit aanbidding sonder opoffering.

my maats was egter die een soos die

ander barry en francois en dirk en henkie hatting selfs org,

nou al dood. nie een van hulle het geweet watter soort hond ek het nie

todat die airedale ‘n skaap gevang het, en toe was daardie geheimenis ook ontwrig.

dit is moontlik dat hulle ouers hul teen mý gewaarsku het. dink ek,

en kam my hare terug.

 

 

© gilbert gibson / 2014

Bookmark and Share

5 Kommentare op “gilbert gibson. ons het half in die middel”

  1. Gisela Ullyatt :

    Gilbert, hiervan hou ek! Lekker om ‘n nuwe gedig van jou te lees.

  2. Marlise :

    goeie gedig hierdie, gg. dit resoneer nou alle rigtings in.

  3. Bernard Odendaal :

    Janee, ‘n boeiende gedig.

  4. Hilda :

    “…die sandklipmure
    was van meer wind as weer…”

  5. maria snyman :

    Definitief vat hierdie gedig iets raak – ek voel geroerd!