Andries Bezuidenhout. Gedig oor die studente wat in Meksiko vermis word

ÊRENS NÊRENS

“We are nowhere and it’s now.”
– Bright Eyes


“Table top dancing” beloof die Cadillac Bar se uithangbordjie

in ʼn nywerheidsdistrik iewers padlangs

tussen Guadalajara se katedrale en die lughawe.

Hoe vertrek mens dan?

Hou stil, laat die taxi luier,

maak ʼn glas vol en maak dit dan leeg.

Dans Catrina, dans op ʼn tafel

en sing van jou lewenshaat, jou doodsvrees

en vra: Waar is hulle?

Vra dit oor en oor: Waar is hulle nou?

Drie en veertig protesteerders

deur polisieskurke aan skurkpolisie oorhandig

en toe spoorloos. Lyke verbrand, word beweer,

verkool en tot as verweer iewers in ʼn rivierloop.

Oorskot uit sand gesif en vir Switserse genetici gepos.

Nou fynkam moeders kleurbaadjies vir hare,

krap in stortdreine rond

en elders grawe hulle ook, Catrina,

kom op soveel lyke af maar nêrens die studente nie.

Aan wie behoort al die grafte dan?

Knip drie en veertig papiervlae uit

en hang dit aan drade in die strate

om almal daaraan te herinner

dat ons nie weet nie, steeds nie weet nie.

Brand ʼn kers Catrina, brand drie en veertig kerse

of dalk meer en vra: Waar is hulle nou?

Laat ons drink en vergeet, drink aan die vergissings

van garingboomblare, drie en veertig glase,

want hulle lieg, hulle almal lieg

Catrina, in die fees van die lig lieg hulle

want die kinders kom nie terug nie

en hulle wil nie sê nie, skurkpolitici en die politieke skurke.

Waar is hulle?

Waar is hulle dan nou?

 

Bookmark and Share

2 Kommentare op “Andries Bezuidenhout. Gedig oor die studente wat in Meksiko vermis word”

  1. Andries Bezuidenhout :

    Ter verheldering, o.a. oor La Calavera Catrina: http://en.wikipedia.org/wiki/Day_of_the_Dead

  2. Andries Bezuidenhout :

    En ‘n artikel deur Homero Aridjis, wat hierdie jaar in Suid-Afrika was. (Dankie Breyten Breytenbach.) http://www.huffingtonpost.com/homero-aridjis/mexico-missing-students-protest_b_6203444.html