Johann Lodewyk Marais. “Die Moruti”

DIE MORUTI

 

 

Die klein moruti met die horrelvoet

het sy eie motor en dra ’n swart pak;

sy vrou in damas groet beleefd.

Pa wys hulle die melkskuur

en uit die strooise op die plaas

kom vanmiddag ’n gemeente,

kom in hulle beste klere

en ruik na Sunlight-seep, Dubbin,

kom na die skuur en sit op die krip.

Ek gaan sit by Sloepek Mokwena

en luister hoe die man met die bril

uit die Testamente e Ntja lees

en oor die liefde van Christus praat;

en hulle sing met stemme

wat ek nie ken uit die kombuis nie

of as in die môre gemelk word

of klere gewas word by die handpomp

of hawer gesny word op die lande nie;

sing hard en soel ’n lied

wat die tik-tik van die sinkdak

in die middaghitte stil maak

en my laat vergeet van die hommelby

wat dreun en sy gat in die muur soek.

 

Bid dat God hulle sal help by die werk

en met die klein boerdery op die land.

 

Bid vir ons almal op die klipvloer.

 

 

(c) Johann Lodewyk Marais

Bookmark and Share

5 Kommentare op “Johann Lodewyk Marais. “Die Moruti””

  1. carina van der walt :

    Hoendervleis gee “Die Moruti”.

  2. Aan die voete van onthou, waar alles naby is en aards. Mens méns is. En God Gód is. En liefde stil is. Dankie, Johann!

  3. Vanaf Umlaasweg maak die pad ‘n wye boog op weg na eMbumbulu, Plek van Misleiding. ‘n Ent voor die afdraai na Eston, in ‘n eens besige maar nou verlate slaghuis, met ‘n houtkruis bo teen die nok van die dak vasgetimmer, het ek ook so ‘n gemeente geleer ken.

    En geleer bid:

    “Baba wethu osezulwini,
    dankie vir die pampoen.
    Vir die bone wat opgekom het,
    lig ek U naam hoog op, Here.”

    So, dankie ook vir die gedig.

  4. Heleen du Preez :

    H van Rensburg – so een met alles.
    Johann Lodewyk Marais – eerlike kinder waarneming waaroop ons dikwels ons latere menswees grond.
    Dankie Johann

  5. Anita de Kock :

    Aangryplike gedig. Dankie Johann