Johann Lodewyk Marais. Out of Africa

OUT OF AFRICA

 

’n Jong man het ’n week lank die vliegtuig

uit ’n olieblik en draad geprakseer

en op ’n straathoek te koop aangebied.

 

Hierdie maaksel het jy bly aangeskaf,

op die glasblad van ’n tafel laat staan

en een foto ná die ander geneem.

 

Die volgende dag staan die stuk buite

op die plaveisel tussen boomvarings,

irisse en ’n koorsboom in die blom

 

asof hy in die nag uitbeweeg het

om gereed te maak, ’n aanloop te vat

en ’n verdere reis te onderneem.

 

Ek het hom in Johannesburg gaan haal,

stewig in my kattebak staangemaak

en versigtig die pad huis toe aangepak.

 

Nou pryk die verroeste vliegtuig van blik

op my lessenaar en sien ek hy lig

op en vlieg esse oor Naivashameer.

 

 

© Johann Lodewyk Marais / 2015

 

 

 

Bookmark and Share

3 Kommentare op “Johann Lodewyk Marais. Out of Africa”

  1. Wilma Snetler :

    Skitterend! Soveel werelde gaan oop met die vlieg van hierdie blik-vliegtuig!

  2. Louis Esterhuizen :

    Johann, ‘n skitterende vers! Van harte geluk …

  3. Ivan Mocke :

    ‘n Lieflike inspeling op DJ Opperman se gedig oor die skip in die bottel. Die gedig sal ek weer en weer wil lees.