Louis Esterhuizen. “‘n Villanelle vir die aarde”

‘n Villanelle vir die aarde

 

Want ‘n klip is die aarde se dagboekinskrywing

en ons vertrou daaraan toe die inskripsies van ons verblyf:

van grafsteen tot monument, van bouwerk tot ruïne.

 

En jy staan in die middel van ‘n veld tussen berge,

weeg in jou hand die geswolle gewig van ‘n stromatoliet.

Want ‘n klip is die aarde se dagboekinskrywing.

 

En jy bekyk die uiagtige stulpings van bakterie

en sediment: soveel water, soveel groei,

van grafsteen tot monument, van bouwerk tot ruïne –

 

En delikaat met die kalksteenlagies vergroei, die tyd

wat skelet geword het in die karstvlaktes van ons verblyf,

want ‘n klip is die aarde dagboekinskrywing.

 

En jy weet nie wat om daarmee te doen nie; jy onthou

soveel klip wat gebreek word, die hamer en pik

van grafsteen tot monument, van bouwerk tot ruïne –

 

Die hordes mense uiteengedryf, verlore langs skrikroetes

van soveel gebalde vuiste en opeengestapelde vrees.

Want ‘n klip is die aarde se dagboekinskrywing

van grafsteen tot monument, van bouwerk tot laaste ruïne.

 

(c) Louis Esterhuizen / April 2015

 

 

Bookmark and Share

Een Kommentaar op “Louis Esterhuizen. “‘n Villanelle vir die aarde””

  1. Hennie Nortje :

    Louis, aan hierdie daad van jou grens inderdaad ‘n ewigheid. Gloeiende digterlike geologie. Welgedaan!