De Waal Venter. “Voortstap”

Voortstap

 

Die seun blaas

’n hees voëlgeluid

met die fluit wat hy gemaak het

van ’n gevoude grasstingel

wat ’n groen grasblaartjie vasknyp.

 

Op die horison

kook wit cumulus wolke

in die troposfeer.

 

Die fiskaallaksman druk

’n kaal voëltjie

met koue presiesheid

op ’n lang wit doring.

 

’n Dooie waterskilpad

se verlammende stank

nooi die honde uit

om daarin te rol en hulleself te beklee

met opwindende, vreemde persoonlikhede.

 

Die dag het onomkeerbaar

verby die middel gedraai,

terwyl die seun deur die gras aanstap –

geeneen van hierdie treë sal ooit

ooit weer gestap word nie.

 

(c) De Waal Venter / Junie 2015

 

 

 

 

Bookmark and Share

7 Kommentare op “De Waal Venter. “Voortstap””

  1. Everline van Dyk :

    Lieflike gedig. Ek was saam op die wandeling.

  2. Ding an sich! x

  3. De Waal Venter :

    Baie raak gestel, Myra. Die werklikheid kan nie geken of begryp word nie? Of bedoel jy ‘n ander vertolking van Kant se stelling? De Waal

  4. Christine Barkhuizen le Roux :

    De Waal – daardie laksman met die voëltjie – sjoe. En dan die anderkant van die munt: dat niemand ooit weer daardie selfde pad sal stap nie.

    Baie geluk met ‘n baie treffende gedig.

  5. Dankie vir jou kommentaar, Christine.

    Die gedig wys ons wel daarop dat ons nooit weer dieselfde pad sal loop nie, maar aan die anderkant – ons het tog die vermoë om die pad weer in ons herinneringe te loop. Dis ‘n groot voorreg.

    Die jongse gedig in my webruimte (klik op die skakel hierbo) handel juis ook oor hoe ons moeders in ons gemoedere bly voortleef.

  6. Christine Barkhuizen le Roux :

    De Waal – nou kry ek dit nie reg om by daardie skakel en daardie gedig uit te kom nie, en ek wil graag – heelwat van die gedigte uit my bundel “skynskadu” het te doen met hoe ‘n ma/moeder in ‘n mens bly leef. Onlosmaakbaar.

    Hoe kry ek die gedig te lese as ek nie hierop kan inkom nie?? Of kan jy dit stuur na my eposadres: ccoverseas@gmail.com? Sal dit baie waardeer.

    C

  7. Hallo Christine. As jy op een van die kommentare op “De Waal Venter” wat onderstreep is, klik, behoort jy by die webruimte uit te kom. Maar ek stuur in elk geval ook vir jou die skakel per e-pos.