Bibi Slippers. Ondersoek na die aard van die geskilderde windhond …

Ondersoek na die aard van die geskilderde windhond met spesifieke

verwysing na die latere werk van Lucian Freud

 

watter weeksdag is die wind-

hond? mens wil dink ‘n woens-

dag, maar, nee: die windhond

is dunner, en ’n dinsdag, dus.

 

wie se kind is die windhond?

die aanteelt van ’n kuitspier

en ’n kantgordyn, of die klein-

tjie van ’n jakkals en ’n sweep?

 

is die windhond meer wenk-

brou of meer tong en waarvan

droom die windhond? wilder-

nis of kussing? oopte

 

of oksel waarin hy sy neus kan

wegsteek? is die windhond met ‘n

rede presies so wyd soos die spa-

sie tussen kardeur en die sit-

 

Plek, of is alles net toevallig? hoe weer-

loos is die windhond werklik? meer

of minder as wat sy effensheid en

bewerasies suggereer? laastens:

 

as die windhond dan ’n leesteken was,

watter leesteken sou hy wees?

’n komma wat ’n asemteug aandui

of die vraagteken op die laken

 

langs die hompe mens?

 

© bibi slippers / 2015

“Gedigte vir Lucian Freud se windhond” – Digters by The Whippet in Linden: Melt Myburgh, Bibi Slipppers, Loftus Marais en Andries Bezuidenhout.

Bookmark and Share

3 Kommentare op “Bibi Slippers. Ondersoek na die aard van die geskilderde windhond …”

  1. Lewies Botha (Skara Mak) :

    Ek lees so lekker aan die gedig. Bibi Ek hoop vir nog baie meer.

  2. charl-Pierre Naude :

    Hierdie is ‘n absoluut fantastiese gedig.

  3. Jaco :

    Ai, hoe verlang ek nou na julle! Bibi, dis eenvoudig beeldskoon. J