De Waal Venter. Stewig in beheer van die kombuistafel

Stewig in beheer van die kombuistafel

 

Die huis is in ’n toestand

van skaars onbeheersde chaos,

dit is in ’n toestand

van beheersde chaos;

skaars chaoties,

onvoldoende beheer.

 

Dogtertjies trek stout gesiggies,

trippe, trappe, tone

oor agnostiese idees

van grootmense.

 

Treine haas verby met Hockneyaanse vulgariteit,

katte tik fyntjies na metafore vir muise,

Vaaldam-water stoot nors aan hulle sluise.

 

’n Gespierde stofsuier

kap gedagtes en gesprekke

in blokkies volstruis-filet.

 

Sonlig leun deur die venster

en streel liefderik oor die pampoen-oranje

teksture op die muur.

Die stilte sit alleen by die kombuistafel,

drink swart koffie

in half-meditasie.

 

Dit is ’n toestand van skaars onbeheersde bestaan,

om beheersd te lewe

skaars in beheer.

 

 

(c De Waal Venter / 2015)

Bookmark and Share

Comments are closed.