Louis Esterhuizen. Die verminkte boom

Chris Barnard

Chris Barnard

Die verminkte boom

In memoriam: Chris Barnard, 28.12.2015

 

Onder die gewig van tak en lower

het ‘n skaduboom middeldeur geskeur.

 

Met die helfte weggekap,

weggedra, bly daar skielik nou

onverwags

 

net hierdie volstrekte oopte oorhoofs.

 

En wanneer al die takke en blare

op die bakkie gelaai is,

 

straat af verdwyn, kyk julle

op na onbegrensde

blou,

 

met die son nou só sonder genade,

 

dat julle gewoon nie wil weet

hoe om die hart

se skaduwerk voortaan

 

met net ‘n halwe boom te besleg nie.

 

 

(c) Louis Esterhuizen / Desember 2015

 

Bookmark and Share

5 Kommentare op “Louis Esterhuizen. Die verminkte boom”

  1. Evette Weyers :

    Dankie vir jou raakskryf, Louis.

  2. Dankie, Louis
    Dit raak my diep, ook omrede jy weet “hoe” om die diep raak digterlik te laat gebeur. ‘n Waardige hulde.

  3. Marthe McLoud :

    Pragtige gedig Louis.

  4. Marie Bredenkamp :

    Ek lees hom nou eers raak, en dit raak my diep, Louis. Ook omdat jou moederboom vandag verskadu en vergly het. Dink aan jou.

  5. Nicolette van der Walt :

    Pragtige gedig, Louis. Watter beter huldeblyk as ‘n boomgedig? Dink ook aan jou.