Nicolette van der Walt. Roosdig

Roosdig

.

In die skemergloed, in die skrape

aan die dag se gekwesde voet,

het vader Ludwig die sierkleed

van ’n roos vermoed:  alarmrooi,

ligtend gelaag teen die naderende nag

met sy sterklitse en maan.

.

Hy het na die snysel in sy palm gestaar,

dit teen horison en vlam beskou,

en in die kweekhuis van sy hande

kroonblaar en nektar konsentries

daarom tot vuurknop, geurkruik

en kokarde vir Venus gevou.

.

Selde nog is verwonding so perfek

tot septer geskulp – digters,

minnaars en rouklaers knieknik voor haar.

.

© Nicolette van der Walt / 2016

Bookmark and Share

2 Kommentare op “Nicolette van der Walt. Roosdig”

  1. Marli :

    Pragtig

  2. Nicolette van der Walt :

    Dankie, Marli.