Bernard Odendaal. Romeinse offisier by die Kruis

Romeinse offisier by die Kruis

 

Hy hang voor my

het net gevra: vergeef hul, God

toe ek hom vas laat kap, laat spot

 

Hy hang voor my

met “Koning van die Jode”-klag

gedoringkroon; ’n lam, geslag

 

Hy hang voor my

roep skor ’n “Eloï” se naam

en donker wolke pak nou saam

’n duisternis pak dikker saam

 

Hy hang voor my

en prewel hy’s van God verlaat

(net ek is hier om mee te praat)

 

Hy hang voor my

verpletter, arms oopgevlerk

’n blote karkas – rou soldatewerk

 

Hy hang voor my

en fluister iets aan my oor dors

Die sponswyn druppel oor sy bors

en spat oor mý gesig en bors

 

Hy hang voor my

en kyk my innig aan deur bloed

Die dank spring op in my gemoed

 

Hy hang voor my

en asem uit: “Dit is volbring”

Ek voel ’n skudding als deurdring

 

Ek staan voor hom

en hoor Jerusalem se kreet

en dan iets diep in my wat weet:

Ek staan voor Hóm!

Die seun van God,

ek staan voor Hóm!

 

© Bernard Odendaal / 2016

 

Bookmark and Share

Een Kommentaar op “Bernard Odendaal. Romeinse offisier by die Kruis”

  1. Margot Luyt :

    Op Goeie Vrydag om 11:00 lees ons hierdie aangrypende vers van Bernard op RSG voor op ons spesiale Vers en klank. Luister.