Rus in vrede, Adam Small (21.12.36 – 25.06.16)

Adam Small

Adam Small

Hartseernuus wat pas bekend gemaak is, is dat prof. Adam Small, digter, skrywer, akademikus en Hertzogpryswenner, vanoggend in die ouderdom van 79 jaar oorlede is. Volgens Netwerk24 se berig het hy gesterf weens komplikasies na ‘n ingewikkelde operasie gister.

Prof. Steward van Wyk, hoof van die departement Afrikaans en Nederlands aan die Universiteit van Wes-Kaapland, wat sy doktorale proefskrif geskryf het oor die werk van Small, word soos volg aangehaal: “(Adam Small) was lank die gewete van die Afrikaanse gemeenskap en het hom sterk uitgespreek teen ‘n maatskaplike onreg, diskriminasie op grond van ras en die geveindsheid van leiersfigure. Hy was ‘n groot vernuwer in die Afrikaanse letterkunde, veral met sy drama Kanna hy kô hystoe. Dit is sy nalatenskap waarvoor ons hom nog baie lank sal eer.”

In 2015 het prof. Small die Hertzogprys vir letterkunde vir sy oeuvre ontvang.

Einde 2015 is ‘n eredoktorsgraad deur die Universiteit Stellenbosch aan dié ikoniese skrywer toegeken.

Verdermeer is prof. Small vanjaar met erelidmaatskap van die Suid-Afrikaanse Akademie vir Wetenskap en Kuns vereer.

Graag betuig ons ons meegevoel aan sy vrou, Rosalie, en hul gesin.

*

 

 

Bookmark and Share

Een Kommentaar op “Rus in vrede, Adam Small (21.12.36 – 25.06.16)”

  1. Webmeester :

    Met vriendelike vergunning deur Tydskrif vir Letterkunde plaas ons onderstaande skakel na ‘n spesiale uitgawe wat in 2012 verskyn het en aan die lewe en werk van Adam Small gewy is. Dit het ten tye van sy 75ste verjaarsdag verskyn.
    http://www.letterkunde.up.ac.za/argief/49_1_eng.html