Breyten Breytenbach. Mossie maar maan

v1

 

mossie maar maan

 

toe die maan half was

soos ‘n stukkende klip

of ‘n binnensmondse skreeu

agter versteende lippe

 

het ‘n voëltjie op die balkon

kom sterf – stil

sonder om aandag te trek

met die pootjies netjies gevou

 

van ‘n leerlingkoster se Sondagshande

maar die nekkie slap

en die oog afgryslik leeg

miskien het miere die kyk weggedra

 

wat sou die rymritme wees

tussen ‘n verweerde ruimteliggaam

wat nie kan sterf

en slegs ‘n wit skaduwee is op die werf

 

en hierdie gestolde moment

van wat vlug en vryheid was ?

alleen die herinnering aan vere ?

het ek die maan probeer begrawe ?

 

is dit van op afkyk in die niet

waar blou vure onsigbaar brand

dat ‘n vlietende vlieënde lewe

verdood moes raak in ‘n oop kwatryn ?

 

vogeltjie

v2

 

Can Ocells, 24 Augustus 2016

 

 

Bookmark and Share

9 Kommentare op “Breyten Breytenbach. Mossie maar maan”

  1. Louis Jansen van Vuuren :

    aangrypende beelde wat gryp

  2. Maria Snyman :

    Baie pragtig. Ek moes nie net verlede week vir Straatkat groet nie, maar die gedig het my dadelik herinner aan hoe ek myself lank gelede byna dood gehuil oor ‘n beseerde duifie wat ek nie kon red nie. Hoe werk dit? Dat ‘n voëltjie se dood mens so kan aangryp. Die lewe bly ‘n ongelooflike geheim!

    Oe, daardie eenvoudige “stil / sonder om aandag te trek” breek my hart! Ek singgroet my Straatkat opnuut!

  3. “is dit van op afkyk in die niet”

  4. “mossie maar maan” – nie alles is vlietend nie

  5. Waldemar Gouws :

    Hierdie bejaarde mossiewyfie se dood was ‘n ideale gawe.Tot haar vere leef in die vers. Ruik sy al na maanskadu?

  6. Engela: ‘n engel wat die digter vermaan?

  7. Daniel: nee, darem nie! Vanuit die leeukuil: eerder so bedoel – die titel troos. Hoewel die ewige dinge (bv. die maan) die “gestolde moment” natuurlik beklemtoon.

  8. Eintlik troos die hele gedig omdat dit ook tot die ewige dinge behoort. (So miskien tog n vermaaning!)

  9. HN Jansen van Rensburg :

    Om so bruin en wit te kan sterf op BB se balkon en dan verewig te word met sulke woorde …