De Waal Venter. Karl Jung ervaar sy psige as ’n seekoei.

Karl Jung ervaar sy psige as ’n seekoei

 

Die seekoei van sy psige

bars deur die oppervlak,

blaas stomende asem

uit wydoop neusgate,

beur uit die water

en trap swaarlywig die riete in.

.

Onder die water het hy gesweef,

danserig op die tone voortbeweeg;

die gewig van die buitewêreld was nie daar nie.

Hy het sy voorouers gesien,

hy het gepraat met wesenlose wesens,

hy het die wêreld om hom verryk

met die mis van sy ervaring.

.

Hier buite

voel die seekoei van sy psige

hoe die son byt in sy vel,

hier gryp hy vragte gras

in sy werkende bek;

hy voel die gewig van die dag

opstyg vanaf sy voete.

.

Netnou gaan hy terug water toe

om party van sy selwe te ontmoet,

die krokodille van sy drome.

 

 

 

© De Waal Venter / 2016

 

Bookmark and Share

Comments are closed.